రచన,స్వరకల్పన&గానం:డా.గొల్లపెల్లి రాంకిషన్ రాఖీ

ఎక్కడ కొలువుంచనూ ముక్కంటి దేవరా
ఏ తావున నిలుపనూ ఓ తిక్క శంకరా
తిరుగ మరిగినోడివి
ఒక పట్టే పట్టనోడివి
నిన్నెలా పట్టేయనూ ఎదకెలా కట్టేయనూ

1.గుండె నుండమనలేను
పాడుబడినదెప్పుడో
మనసున బస చేయమనను
మసిబారిందెన్నడో
నీళ్ళంటే నీకిష్టము గంగాధరా
నా కళ్ళలొ పుష్కలము మునిగితేలరా

2.ఇంటికింక పిలువలేను
ఇక్కట్లే ఆక్రమించుకొన్నాయి
ఒంటిలోన స్థలమీయ లేను
రోగాలే పీడించుతున్నాయి
అక్షరమే నీతత్వము సదాశివా
అక్షరముల బంధింతును నిను సదా శివా