రచన,స్వరకల్పన&గానం:డా.రాఖీ

తపములే చేయాలా నిన్ను రప్పించ
జపములే చేయాలా నిన్ను మెప్పించ
సాధ్యమే కాదు నాకు యాంత్రికుణ్ణి నేను
వాస్తవాలు నిగ్గదీయకు కాస్తనాస్తికుణ్ణి నేను
ఉనికి తెలుపుకోవయ్యా ఉమాశంకరా
పనికిరావేల ఉంటే ఫాలనేత్రుడా

1.అర్చనలూ అభిషేకాలు లంచాలా నీకు
హారతులు నైవేద్యాలు నజరానాలెందుకు
నువ్వు ప్రసన్నం కావాలంటే ప్రదోష దీక్ష చేయాలా
నువ్వు వరములీయాలంటే ముడుపులిచ్చుకోవాలా
బదులు పలుకవేమయ్యా బాలేందు శేఖరా
ఆదుకొనుగ రావయ్యా  అర్ధనారీశ్వరా

2.నీ గుళ్ళూ గోపురాలు నిశ్చయంగ దర్శించాలా
తీర్థాలూ యాత్రలన్ని మేము తిరిగి తీరాలా
కన్నతండ్రి పెట్టగలడా కరుణాకరా ఇలా ఆంక్షలు
ఆత్మలోన కనుగొంటే అవ్యక్తుడా ఏలా పరీక్షలు
చిత్రవధలు మాకేనా చిదానందుడా
ఘోరయాతనకు తుది లేదా నీలకంధరా