రచన,స్వరకల్పన&గానం:డా.రాఖీ

నమ్మశక్యమైతె కాదు దేవకన్యవే నీవు
నా భాగ్యమేమొ గాని నను వరించినావు
వెదకబోయిన తీగనే తనకుతానె తాకినట్లు
విస్తుబోవ సిరితానే ఇంటితలుపు తట్టినట్లు
దొరికినావే నీవు  నిధిలాగ నాకు
నువు లేక శూన్యమై చితికేను బ్రతుకు

1.అందమైన హృదయం నీది అందించినావే
సరిజోడునని ఎంచి ప్రేమనంత పంచినావె
ఎంతటి అదృష్టమో నీవాడిగ మనగలిగా
దేదీప్యమానమైన దీపమోలే నే వెలిగా
 తీర్చిదిద్దినావే ఆదర్శ పురుషునిగా
మార్చివేసినావే మర్యాద రామునిగా

2.బండరాయినైన నన్ను శిల్పంగా చెక్కావు
గుండెగుడిలొ నెక్కొల్పి  దైవంగా మొక్కావు
కంటగింపుగా ఉంది మనజంట ఎందరికో
కన్నుకుట్టుతోంది ఈర్ష్యాద్వేషాలతో
లోకమంత ఏకమైనా చెరగదు మన అనుబంధం
కాలాలు మారినా ఇగురదు అనురాగ గంధం