రచన,స్వరకల్పన&గానం:డా.రాఖీ

ఇసుకతిన్నెలు అడుగుతున్నవి
చెలి జాడ ఏదని ఏమైందని
వెన్నెలమ్మా వెతుకుతున్నది
మన జంట ఆచూకి ఏదని
గోదావరి కంటనీరే కారికారి ఇంకిపోయే
ఏకాకిగ మారినానని ఎరిగినంతనే ఖిన్నయై

1.గట్టుమీది వేపచెట్టు జాలిగా ననుచూస్తోంది
చెట్టుకొమ్మన పాలపిట్ట ఓదార్చగ కూస్తోంది
బడిగోడల చెక్కబడిన మన పేర్లు వెక్కిరిస్తున్నవి
గుడిలొజేగంట సైతం నన్నుగని మౌనవిస్తోంది
మోడుతోడై నిలుస్తోంది ఇద్దరం ఒకటేనని
కాడు ప్రేమగ పిలుస్తోంది నను రారమ్మని

2.కొండలాంటి బండలే నాగుండె కన్నా మెత్తనైనవి
పాడుబడిన కోటకూడ నామనసుకన్నా కొత్తనైనది
మండువేసవి ఎండ ఎంతో హాయినిస్తోంది నాకు
నల్లతుమ్మ ముల్లుగుచ్చిన నొచ్చినట్టే లేదు నాకు
నీవు లేని లోకమంతా ఎడారల్లే తోస్తోంది
నిన్ను చేరగ ప్రాణమే ఎంతగానో తొందరిస్తోంది