రచన,స్వరకల్పన&గానం:డా.రాఖీ

కళ్ళతోనే జుర్రుకుంటా-మకరందమేలే నీ అందము
చూపుతోనే గ్రోలుతుంటా-అమరసుధయే నీ అధరము
ఎలానిన్ను సృష్టించాడో బ్రహ్మదేవుడు
నిను పొందినోడే ఇలలో అదృష్టవంతుడు

1.జాబిలిని మాయచేసి నీ మోమున అద్దాడు
రవిబింబం వాలినప్పుడే నీ నుదుటన దిద్దాడు
నీలిమేఘమాలను తెచ్చి నీ కురులుగ మార్చాడు
పలురకాల విరులను గుచ్చి నీ మేనున కూర్చాడు
ఇలానిన్ను సృష్టించాడే బ్రహ్మదేవుడు
నిను పొందినోడే ఇలలో అదృష్టవంతుడు

2.ముందేమో వింధ్యామలలే ఎదన పేర్చాడు
వెనకాల మేరుగిరులనే నితంబాలు చేసాడు
రోదసీకుహరాలు పొంకాలుగ అమరించాడు
కృష్ణబిలాలేవో పొందికగా నిర్మించాడు
విశ్వరచన చేసాడు నీలో బ్రహ్మదేవుడు
నిను పొందినోడే ఇలలో అదృష్టవంతుడు