రచన,స్వరకల్పన&గానం:డా.రాఖీ

రాగం:హిందోళ వసంతం

స్వరం దేవుడిచ్చిన వరం
ఎలుగెత్తి ఆలపించగా తనువంతా రోమాంచితం
గాత్రం పరమ పవిత్రం
అపాత్రదానమనిపించేలా ఏల గర్వసంచితం
రంజింపజేయడమే గాయనీగాయక ధ్యేయం
మంజుల కలనిస్వనమే శుకపిక న్యాయం

1. సరాగాలు చిలకాలి మేను వీణగా మార్చి
శ్రావ్యతే ఒలికించాలి మనసు పులకరించి
మైమరిచిపోవాలి శ్రోతలూ గీతప్రదాతలు
స్థాణువులై నిలవాలి సకల జీవజాతులు
రంజింపజేయడమే గాయనీగాయక ధ్యేయం
మంజుల కలనిస్వనమే శుకపిక న్యాయం

2.శ్రుతితొ సంధానించాలి  జీవరావము
లయకు నిలయం కావాలి హృదయనాదము
శ్రుతి లయల మేళనంలో అనురాగం ఉదయించాలి
రాగతాళ సంగమంలో రసయోగం సిద్ధించాలి
రంజింపజేయడమే గాయనీగాయక ధ్యేయం
మంజుల కలనిస్వనమే శుకపిక న్యాయం