రచన,స్వరకల్పన&గానం:డా.గొల్లపెల్లి రాంకిషన్ రాఖీ

నింగిన పూసే సింగిడి నీవు
నగవులు కాసే జాబిలి నీవు
దారితప్పి నేలన రాలిన ఉల్కవు నీవు
వేకువ వాకిటి వెలిగే వేగుచుక్కవు నీవు
మన మైత్రీబంధం హిందోళరాగమై
మన కవన సుగంధం సంధ్యార్ణవమై

1.కైలాసగిరిపై మెరిసే పసిడి ఉషఃకిరణం  నీవు
తాజ్ మహల్ పైన కురిసే చంద్రాతపం నీవు
కొలనులో విచ్చుకున్న ఎర్రకలువవే నీవు
రవినిగాంచి తలతిప్పే సూర్యకాంతి పూవు నీవు
మనస్నేహ యోగమే మోహనమై
సాహితీ సంగమమే జీవనమై

2.ఎడారిలో పిపాసికీ ఒయాసిస్సు నీవు
ఊబిలోకి జారేవేళ ఊతమై నిలిచేవు
ఊపిరాగిపోతుంటే ప్రాణవాయువౌతావు
నీవున్న తావులో మోదాన్ని పంచుతావు
మన చెలిమియే హంసానందియై
సారస్వతలోకంతో మనం మమేకమై

చిత్ర సహకారం: Sri.  Agacharya Artist