రచన,స్వరకల్పన&గానం:డా.రాఖీ
తెల్లకలువ సొగసుగాంచ -ఎర్రకలువ విరిసింది
ఎర్ర కలువ విలువనెంచ-తెల్లకలువ మురిసింది
గుసగుసలాడాయి మల్లెలు
రుసరుసలాడాయి మందారాలు
వందనాలు నీ అందానికి కుందనపు బొమ్మా
నీరాజనాలు నీ సౌరుకు చందనపు కొమ్మా
1.అరవిందానన అరవిందలోచన
అరవిరిసిన విరిబోడివి నిజముగ నీవేయన
పరిమళాలు వెదజల్లగ పారిజాతమీవేయన
మరువము నీ పరువము దవనమే జీవనము
వందనాలు నీ అందానికి కుందనపు బొమ్మా
నీరాజనాలు నీ సౌరుకు చందనపు కొమ్మా
2.చామంతులే నీ నయన కాంతులు
పూబంతులే నీసిగ్గుల దొంతరలు
తంగేడు పూలరంగు నీ ఒంటికే హంగు
పున్నాగపూల నునుపు నినుతాక మత్తుగొలుపు
వందనాలు నీ అందానికి కుందనపు బొమ్మా
నీరాజనాలు నీ సౌరుకు చందనపు కొమ్మా
No comments:
Post a Comment