https://youtu.be/GSSyg4la75A?si=ఎకామోర్ఫ్లమక్వాటేఫ్

రచన,స్వరకల్పన&గానం:డా.గొల్లపెల్లి రాంకిషన్(రాఖీ)

రాగం :కనకాంగి

ప్రాణమున్న పాలరాతి బొమ్మలు
పదారణాల తెలుగింటి ముద్దుగుమ్మలు
నటరాజు పాదాల రవళించు మువ్వలు
సరస్వతి చరణాల కడతేరు పువ్వులు
నా పాటలు రసహృదయుల మనోరంజితాలు
నా పాటలు పాఠకాభిమానుల ప్రశంసా ఫలితాలు

1. శ్రీ కృష్ణుని పదహారువేల గోపికలు
అష్టదశ పురాణాల సంగ్రహ దీపికలు
గీతామృత సారమొలుకు సంచికలు
భవ జలధిని దాట దారి సూచికలు
నా పాటలు రసహృదయుల మనోరంజితాలు
నా పాటలు పాఠకాభిమానుల ప్రశంసా ఫలితాలు

2.సైరిక సైనిక శ్రామిక భావనా ప్రతీకలు
కులమతాతీత మానవతా గీతికలు
మమతానురాగాల స్నేహ వీచికలు
భరతమాత కీర్తిచాటు పతాకలు
నా పాటలు రసహృదయుల మనోరంజితాలు
నా పాటలు పాఠకాభిమానుల ప్రశంసా ఫలితాలు

3.విశ్వజనీనమైన ప్రేమ సంతకాలు
సరస ప్రణయ శృంగార ఉత్ప్రేరకాలు
విరహానల జ్వాలాన్విత తమకాలు
దీనుల వేదనాశ్రుధారల ప్రవాహకాలు
నా పాటలు రసహృదయుల మనోరంజితాలు
నా పాటలు పాఠకాభిమానుల ప్రశంసా ఫలితాలు