ఉన్నదే ఇపుడున్నదే జీవితం
చేజారినదంతా గతం
కాలప్రవాహంలో కరిగెను స్వప్నం
ఎపుడే మలుపు తిరుగునో
జీవిత నాటకం

1.బండ్లు ఓడలైతే ఎంతటి అదృష్టం
ఓడలు బండ్లవడమే ఓ నగ్నసత్యం
జీర్ణించుకోగలేని పరిణామాలు
ఊహించగాలేని ఉత్పాతాలు
నిన్నటి నందనవనమే నేటి స్మశానం
కట్టెలమ్ముకొట్టాయే పూలదుకాణం

2.యథాతథంగా సాగాలి బ్రతుకు రథం
ఎత్తు పల్లాలెన్నున్నా ఉన్నది ఒకటే పథం
శీలలే ఊడినా ఆగదు ఈ పయనం
చక్రమే తొలగినా చేరకతప్పదు గమ్యం
ఆశించినప్పుడే మనషికి ఆశాభంగం
ఎదురీదక స్వీకరిస్తే ఎనలేని ఆనందం