రచన,స్వరకల్పన&గానం:డా.రాఖీ

రాగం:దర్బార్ కానడ

తామరాకు మీది నీటిబొట్టు నీ గుట్టు

బ్రహ్మకైన బోధపడదు నీ తాత్విక పట్టు

చూడబోతె ఇరుపత్నుల సంసారివి

వాడవాడ బిచ్చమెత్తు సన్యాసివి

ఎంతవింతదయ్య నీమాయ సదయ్య

చింత మాయ  నీ చింతన హాయి కదయ్య

1.ఆది అంతమే అసలులేనివాడివి

అనాదిగా దైవమైన పరమశివుడివి

ఇల్లూ వాకిలీ నీకంటూ పట్టవేవి

ఏనుగుతోలునే ఎపుడూ కట్టితివి

నిన్నుచూస్తె తెలియదా నిరాడంబరమేంటో

అడిగిందల్లా ఇచ్చే నీవల్ల త్యాగమంటేమిటో

2.అందాలను ఏమాత్రం నువు ఆశించవు 

బంధాల వలలోన ఎన్నడూ చిక్కవు

సత్రపు భోజనం మఠంలో నీ నిద్ర

నాకు తోడు నీవేరా కరుణా సముద్ర

నీ కంటె సుఖపురుషుడు ఎవ్వరీ లోకంలో

నిన్నుమించి స్థితప్రజ్ఞులున్నారా ఈ ఇలలో

Pic courtesy: Agacharya Artist