Tuesday, May 11, 2021

 రచన, స్వరకల్పన&గానం:డా.రాఖీ


(నేటి {10th  MAY}మా  వివాహ 31 వ వార్షికోత్సవం సందర్భంగా నా ప్రియమైన శ్రీమతి 'గీత'కు ప్రేమకానుక)


భార్యకు సరియైన   పర్యాయపదమీవే

దేవేరికి ఉచితమైన నిర్వచనం నీవే

అర్ధాంగికి అసలైన అర్థమూ నీవె

ఇల్లాలుకు ఇంపైన రూపకమూ నీవే

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే


1.నీ గొప్పతనమేలే నను భరించడం

ఘనమైన నీగుణమేలే నను సహించడం

క్షణమైన నువులేక యుగమౌ నిరీక్షణం

నీతో దాంపత్యం నిత్యనూతనం విలక్షణం

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే


2.సీత సైతం దాటలేని నాపాలిటి గీతనీవే

జీవితగతికే ప్రగతిని కూర్చే కృష్ణ గీతనీవే

ఏడేడు జన్మలకు విధిలిఖిత నా నుదుటిగీతవే

నా కలం ఆలపించే ప్రతి మధుర గీతమీవే

ఓ చంద్రముఖీ నా ప్రాణసఖీ నా భాగ్యమీవే

ఓ చామంతీ నా దమయంతీ నా బ్రతుకు నీవే

No comments: