రచన,స్వరకల్పన&గానం:డా.రాఖీ
ఉషస్సులో రవి బింబం
నిశీధిలో శశి బింబం
సుందరమేనీ ముఖారవిందం
తొలిచూపులోనే వేసింది బంధం
అణువణువు నను తాకనీ నీ తనువు
మనసుకు మనసుకు జరుగనీ మనువు
1.నీ వాల్జడలో పూలమాలను నేనై
నీ పాపిట మెరిసే సిందూరము నేనై
నుదుటన వెలిగే తిలకము నేనై
నీ చెవులకు ఊగేటి జూకాలు నేనై
అణువణువు నను తాకనీ నీ తనువు
మనసుకు మనసుకు జరుగనీ మనువు
2.నీ సోగ కన్నులకు కాటుక నేనై
సంపంగినాసికకూ ముక్కుపుడకనై
నీ సొట్ట బుగ్గలకూ నునుసిగ్గు నేనై
మందార పెదవులకూ చిరునవ్వునై
అణువణువు నను తాకనీ నీ తనువు
మనసుకు మనసుకు జరుగనీ మనువు
3.శంఖమంటి కంఠాన నే వజ్రహారమై
నిను హత్తుకోగా బిగుతు రవికనేనై
నిన్నల్లుకోగా నేనే చెంగావి చీరనై
నీ నడుము చుట్టకోగా వడ్డాణమునై
అణువణువు నను తాకనీ నీ తనువు
మనసుకు మనసుకు జరుగనీ మనువు
No comments:
Post a Comment