రచన,స్వరకల్పన&గానం:డా.రాఖీ
పులకరించిపోతావు చిరుగాలికైనా
పరవశించిపోతావు చిరుస్పర్శకైనా
మనసా నీవెంతటి బేలవే-మనసా నీవెప్పటికీ బాలవే
పొంగిపోతుంటావు పొగడ్తకు
కృంగిపోతుంటావు తెగడ్తకు
మనసా నీవో పసికూనవే-మనసా నీవో రసవీణవే
1.పట్ట పగ్గాలుండవు నీ ఆనందానికి
భుజంతట్టి ప్రోత్సహించె అభిమానానికి
చెలియలి కట్టే ఆగదు నీ ఉద్వేగాలకి
వెన్నుతట్టి ప్రశంసించు అభినందనలకి
మనసా నువు బలహీన రివటవే నిజంగా
మనసా బహురూపుల నటివే సహజంగా
2.నీరింకి పోని కొలనులు నీ కనుగవలు
అంతులేని అగాథాలు నీ ఎదలోతులు
సంతోషం ఉప్పెనైతే ఆనందభాష్పాలుగా
ఆవేదన గుప్పెడైనా దుఃఖ భాష్పాలుగా
మనసా ఎలావ్యక్త పరచను నీ స్ఫూర్తిని
మనసా ఎలా ఓదార్చను నీ ఆర్తిని
No comments:
Post a Comment