రచన,స్వరకల్పన&గానం:డా.రాఖీ
నిలుపమనుచు కోరలేదు నను ఉరమున శ్రీపతి
ఆసనమడుగనైతి అంకమందు నిను వేంకటపతి
కడతేరగ నిను వేడితి నీ పదాబ్జ శరణాగతి
సులభమైన పర సాధన వసుధన నీ సన్నిధి
నమః శ్రీనివాసాయా నమో దీననాథాయా
తిరుమల వాసాయ నమో శ్రితజనపోషాయా
1.అప్పులున్నవాడివాయే సంపదలడుగ గలన
తిప్పలున్న వాడివాయె నొప్పినెరుకపరుచ గలన
అప్పడివీవని ఎప్పుడు తలచెద నీగురించి గొప్పగ
చెప్పడమేలనీకు ముప్పును గ్రహించి అనుగ్రహించగ
నమః శ్రీనివాసాయా నమో దీననాథాయా
తిరుమల వాసాయ నమో శ్రితజనపోషాయా
2.కర్మలు సహజమాయే నీ మర్మము బోధపడగ
పూజలు రివాజాయె కవితలుగా వెలువడగా
యాంత్రిక మాత్రమైతినే బంధాలలొ చిక్కుపడగ
ఆత్రము మితిమీరిపోయే స్వామి నీపై మనసు పడగ
నమః శ్రీనివాసాయా నమో దీననాథాయా
తిరుమల వాసాయ నమో శ్రితజనపోషాయా
No comments:
Post a Comment