రచన,స్వరకల్పన&గానం:డా.రాఖీ

ప్రేమించు ఎద ఎదకూ ప్రేమను పంచు

ప్రేమకు సరియగు అర్థంతో ప్రేమగా వ్యాపించు

మోహమనో కామమనో  ప్రేమ ఎలా తలపించు

విశ్వజనీనమైన ప్రేమను ఉచితంగా నిర్వచించు

1.జీవుల ఎడ చూపేది జీవకారుణ్యము

సాటి మనిషికి సాయం చేస్తే మానవత్వము

లలిత కళాకారుల పట్ల చూపేది అభిమానం

ప్రకృతి స్త్రీ రమణీయతలో సౌందర్యోపాసనం

2.కనులతో చూసే అందం కడుపు నింపుకోలేము

శ్రవణపేయమౌ సంగీతం ఒంట నిలుపుకోలేము

పంచేంద్రియ రంజకమంతా ఆస్వాదనార్హము

క్షణికమైన జీవితాన ప్రేమ అనుభవైకవేద్యము

3.బహుముఖీయమైనది ప్రేమరస పూరిత గంగ

తరచిచూస్తేనో మమతానురాగప్రణయ పరాగంగ

వాత్సల్యంగా ఆరాధనగా భక్తి గౌరవాల సంగమంగ

పాత్రలోన ఇముడుతుంది ప్రేమఅన్నది కడుచిత్రంగ