నా వెన్నుదన్ను నీవే అన్నులమిన్నా

నా ఎదకు కన్ను నీవే

వన్నెల వదనా

నా ప్రతి విజయం వెనక నీవే

నా శ్రీమతి గీతా

అడుగడుగున తోడునీవే  సుందర హసితా

అందుకో అందమా నీకివే నా శుభకామనలు

నీ పుట్టిన రోజిది గొనవే వేవేల దీవెనలు

1.సరిగమలను ఒలికించే సంసార వరవీణవు

మధరిమలను చిలికించే నా మానస సదనవు

అనుకున్నది సాధించేలా విశ్వాసం నింపే ప్రేరణవు

తరచి తరచి తర్కించే నా జీవన విశ్లేషణవు

అందుకో అందమా నీకివే నా శుభకామనలు

నీ పుట్టిన రోజిది గొనవే వేవేల దీవెనలు

2.ఉడికించేవు ఊరించేవు వారించేవు వారిజనేత్రి

మురిపించేవు నను మై మరపించేవు కోమల గాత్రి

సహనంలో సాటి నీకు రాగల దిలలో ఒకటే ధరిత్రి

శతమానం భవతి నా ప్రియసతీ

వీడనీకు మన జన్మల మైత్రి

అందుకో అందమా నీకివే నా శుభకామనలు

నీ పుట్టిన రోజిది గొనవే వేవేల దీవెనలు