రచన,స్వరకల్పన&గానం:రాఖీ

సార్థకమవ్వాలినీ నామధేయాలు
ఉధ్ధరించవయ్యా స్వామి మా జీవితాలు
ఆర్తితో పిలిచేము అవతరించవయ్యా
ఆశగా కొలిచేము కనికరించవయ్యా
తిరుమల తిరుపతి పురవాసా
కలి కల్మష నాశా
సప్తగిరీశ ఈశ దాసపోష

1.పాపాలు శాపాలు మసిచేయర వేంకటేశ
ఆపదలను ఆపవయ్య ఆపదమొక్కులవాడ
సందలను కలుగజేయీ హే  శ్రీనివాసా
ఋణబాధల తొలగించు వడ్డికాసులవాడ
తిరుమల తిరుపతి పురవాసా
కలి కల్మష నాశా
సప్తగిరీశ ఈశ దాసపోష

2.దాంపత్య సౌఖ్యమీయి అలమేలు మంగాపతి
అనురాగము ఇనుమడించు పద్మావతి ప్రియపతి
కనులయందు చెరగనీకు బాలాజీ నీ ఆకృతి
తోడునీడవై చేర్చు గోవిందా మమ్ము సద్గతి
తిరుమల తిరుపతి పురవాసా
కలి కల్మష నాశా
సప్తగిరీశ ఈశ దాసపోష