రచన,స్వరకల్పన&గానం:రాఖీ

మేధకు అధిదేవతవు-వాక్కునకే ఏలికవు
బాసరపుర భాసితవు-జ్ఞానసరస్వతి మాతవు
అంజలి నీకిదే మంజుల వాణీ
హారతిగైకొనవే వీణాపాణీ

1.మరపునకే వెరపు నీవు-నన్నేల మరచినావు
శారదవై వరలుతావు-తపనలేల పెంచుతావు
తల్లివి నీవుండగ-తల్లడిల్ల జేతువేల
అమ్మవు నీవాదరించ-ఆదుర్దాకు తావేల
దయగనవే తక్షణమే-తరగని కరుణా వీక్షణివీవే

2.మనసుకు హాయిగొలుపు-సంగీతము నీవు
మెదడును చైతన్య పరచు-ఉత్తేజము నీవు
నీ గానము కాదేల-దివ్యమైన ఔషధము
నీ ధ్యానము కూర్చదేల-ఆత్మానందము
లోపములెంచబోకె-లోకజనని సనాతని