మనసు ఏ మూలల్లోనో-గుండె ఏ లోతుల్లోనో
దాగి ఉంటుంది మానవత్వము-
మిగిలి ఉంటుంది ప్రేమతత్వము
మనిషివనే సంగతి మరచి మనబోకు నేస్తమా
మూడునాళ్ళ జీవితానికి సార్థకతను కూర్చుమా

1.ఏదో ఒక దృశ్యం నిన్ను కదిలించక మానదు
ఏదో ఒక కవనం నిన్ను మేల్కొలుపక సాగదు
బండరాళ్ళు సైతం కరుగుతాయి సంగీతానికి
లోకమంత క్షామమైనా కరువుండదు కంటనీటికి
మనిషివనే సంగతి మరచి మనబోకు నేస్తమా
మూడునాళ్ళ జీవితానికి సార్థకతను కూర్చుమా

2.గోచైనా లేకుండా వచ్చాము ఇలాతలానికి
చిల్లికాసునైనా కొనిపోము మనతో స్వర్గానికి
ఉన్నదాంట్లొ ఎంతోకొంత సాయపడితె సంతృప్తి
చేదోడువాదోడై ధైర్యమిస్తె తరగదు ఆస్తి
మనిషివనే సంగతి మరచి మనబోకు నేస్తమా
మూడునాళ్ళ జీవితానికి సార్థకతను కూర్చుమా

3.అరిషడ్వర్గాలలో లోభమే కడు హీనం
పదితరాలసంపద ఉన్నా చేయబోము చిరుదానం
నేత్రమూ రక్తమూ ఏదైనా వితరణయే
చితిలొ కాలు అవయవాలు వదాన్యతకు అర్హమైనవే
బలి శిభి దధీచి కర్ణులు దాతృత్వ శ్రేష్ఠులు
లేదనక కోరిన దిచ్చిన ఆదర్శప్రాయులు