ఇచ్చిన పండుతోనె కడుపు నింపుకో
ఇదే ప్రసాదమనుకొని కళ్ళకద్దుకో
దైవాన్ని ప్రశ్నించగ నీ అర్హతేమిటి
విధినే నిలదీయగ నీ ప్రజ్ఞ ఏపాటిది

1.వికృతంగ నీకు ఆకారమిచ్చినా
వక్రబుద్ది నీలోన కలిగించినా
వీథుల్లో తిరిగులాగ అనాథనే చేసినా
క్షుద్బాధ తాళలేని దొంగగ నిను మార్చినా
దైవాన్ని నిందించగ నీసుకృత మేపాటిది
విధిని తూలనాడగనీ పుణ్యశేష మెంతటిది

2.కష్టాలు మూకుమ్మడి దాడి చేసినా
మానలేని రోగాలు ఎంతగ పీడించినా
ఋణ బాధలు కరుణమాని కలచివేసినా
లోకమంత ఏకమై నీపై పగబూనినా
దైవం దయజూడగ నీ నమ్మిక ఎంతటిది
విధినీకు వరమీయగ నీవినతులు ఏపాటివి

3.మునులవోలె తీవ్రమైన తపస్సులే చేసావా
ఋషులతీరు యజ్ఞయాగ హవిస్సులే వేసావా
రావణబ్రహ్మ లాగ రుద్రవీణ మీటావా
శబరిలాగ ఏళ్ళకేళ్ళు వేచివేచి చూసావా
అంతటివారికే తప్పలేదు తిప్పలు
ఎంతటివారికైన విధివింత పరీక్షలు