https://youtu.be/fygR1mFyMrY?si=EfOSr6cMDibReCqb

చెప్పుకుంటె సిగ్గుచేటు
చెప్పకుంటె గుండె పోటు
మానవత అనాధగా తిరుగుతోంది
మాయువత మత్తులో జోగుతోంది
నా దేశ ప్రగతి ఆకాశవీథిలో
నా దేశ సంస్కృతి నడివీథిలో

1.ఎన్నికలే కల్లోలం నా ప్రజా స్వామ్యంలో
అధికారమె ప్రాథమ్యం రాజకీయమైకంలో
వ్యక్తిత్వం ఆత్మహత్య చేసుకుంటుంది
సిద్ధాంతం పట్టపగలు హత్యచేయ బడుతుంది
నా దేశ రాజ్యాంగం ఆదర్శప్రాయము
నా దేశ స్వాతంత్ర్యం అనిర్వచనీయము

2.నగ్నత్వం నగ్నంగా నాట్యమాడుతుంది
మృగత్వం పసికూనలననుభవిస్తుంటుంది
విలువల వలువలిచట చిరుగుల పేలికలు
కన్నవారి బంధాల్లో కాముకతల కతలు
నా దేశం ఉమ్మడి కుటుంబాలకాలవాలం
నా దేశం చిత్తకార్తి కుక్కల వ్యవహారం

3.విద్య భారతావనిలో చుక్కలుచూపెడుతోంది
మార్కులవేటలో మూర్ఖంగా నలుగుతోంది
వైద్యం విధిని విడిచి డబ్బులెక్క పెడుతోంది
నైపుణ్యం విదేశాల వెర్రిలో ఎదుగుతోంది
నా దేశం మేధావుల ఖజానా
నా దేశం స్వార్థానికి నమూనా