రచన,స్వరకల్పన&గానం:రాఖీ

రూపము గనినంత చూపరులకు భీకరము
చల్లనైన నీదృక్కులు సర్వదా శ్రీకరము
నీ దర్శన భాగ్యమే ఆనందకరము
భవభయ హారకము నీ అభయకరము
ధర్మపురీ నరహరీ నీకు వందనాలయా
మము దయజూడగ శ్రీ చందనాలయా

1.వైశాఖ శుద్ధ చతుర్ధశీ రోజున
గోధూళివేళ స్తంభమునందున
నీ శ్రీ హరిఏడీ ఢింబకా చూపుమని
హిరణ్యకశ్యపుడు గద్దించినంతనే
సర్వాంతర్యామివని చాటిచెప్పడానికి
ఉద్భవించినావు ప్రహ్లాదుని మొరవిని

2.శిరమేమో కేసరిగా నరశరీరధారిగా
ద్వారమే పీఠముగా ఆసీనుడవయ్యి
భీషణ దంష్ట్రలు వాడియౌ నఖములతో
ఊరువుల పైనా ఒక ఉదుటున వేసుకొని
ఉగ్ర నారసింహుడవై ఉదరమే చీల్చివేసి
దితి సుతుని హతమార్చి నీ భక్తుని బ్రోచితివి

3.గోదావరి తీరమున ధర్మపురీ క్షేత్రమున
శ్రీ లక్ష్మీ సహ యోగ నరసింహమూర్తిగా
వెలసినావు స్వామి నీ మహిమలు జూపగా
మలచినావు స్వామీ మా బ్రతుకులు నీవిగా
శేషప్పవరదుడవై శతకము రాయించితివి
రాఖీప్రియ సఖుడవై సతతము నువు కాచితివి