శంభో  హరహరా
మనోహర హరా
త్రిపురాసుర సంహరా హరా
త్రిభువనైక ఈశ్వరా భవహరా
కరుణాకరా శంకరా
అంజలింతు నీకిదే శుభకరా

1.మురిపెము తోడ పార్వతమ్మ
నలుగుపిండితో చేసెగ బొమ్మ
ఆయువునొందే ఆ బాలకుడై
అమ్మ ఆనతిన కాచె ద్వారపాలకుడై
ఎరుగక నిన్నే నిరోధించగా
ఆగ్రహమును నువు తలను ద్రుంచగా
ఆలి దుఃఖమును బాపగబూని
కరిశిరమతికి కనికరించితివి గణపతిని

2.దేవగణముల  వినతి మేరకు
కుమారసంభవ శుభ కామనకు
చెఱకు వింటి వేలుపు
వేయగ నీపై సుమాల తూపు
తపోభంగముతొ సోకక నీచూపు
కాముని దహించె నీ కనునిప్పు
పరమేశ్వరా నా అరిషడ్వర్గము తెంపు
దోషము బాపి కలిగించ కనువిప్పు