మోముదాచుకున్న ఓ మోహనాంగి
నీ మేని మెరుపు దబ్బనిమ్మపండుభంగి
మబ్బుచాటు చందమామ చూశాడు తొంగితొంగి
గులామయీ సలాముచేసె వంగి వంగి

1.నీ నవ్వులు సంతూరు సంగీతం
నీ పలుకులు కుంతాల జలపాతం
నీ అధరాల ఆస్వాదన అమృతం
నిను పొందితె నా బ్రతుకే సరసగీతం

ముట్టుకుంటె ముడుచుకునే కోమలాంగి
నీ మేని నునుపు లేత తమలపాకు భంగి
తుళ్ళిపడే నిన్నుతాకి  గులాబి రేకు
రాలిపడే తనకుతానే తాళలేక నీ సోకు

2.లోకాన అతి మధురం నీతో ఏకాంతం
గడిచేను క్షణమోలె యుగాలు సాంతం
ప్రత్యక్షమవవే  నాకై సఖీ అమాంతం
అంకితమైపోతానే నాజీవిత పర్యంతం

చిలిపి లిపితొ  చూపువిసురు చిత్రాంగి
నీకంటి భాష అంతుపట్టలేని భంగి
మతిచలించి పోయింది భారతిపతికి
నా మీద ప్రయోగిస్తే నే చేరేద నేగతికి