నీ కోవెలలో వెలిగిస్తా నూనె దీపం
నా తలలో వెలిగించు జ్ఞానదీపం
నీగుడిలో వెలిగిస్తా నేతి దీపం
నా గుండెలొ వెలిగించు నీతి దీపం-నిజాయితి దీపం
తిరుమలవాసా ఎంచకు లోపం
తిరువేంకటేశా పరిమార్చర పాపం

1.పూమాల నీమెడలో వేసెద
కామాదులు కడతేర్చగ వేడెద
నామాలు నుదుటన దిద్దెద
ప్రేమానురాగాల నర్థించెద నర్తించెద
తిరుమలవాసా నీరూపం అపురూపం
తిరువేంకటేశా తీర్చర పరితాపం

2.నీ ఆకృతి తన్మయముగ వీక్షించెద
సంస్కృతీ ధర్మాలు సంరక్షించెద
నీమీద కృతులనే రచించెద
నీ గుణగానాల నాలపించెద నీకై తపించెద
తిరుమలవాసా నువు వర్ణనాతీతం
తిరువేంకటేశా నువు కరుణా జలపాతం