రచన,స్వరకల్పన&గానం:రాఖీ
రాగం:ఆందోళికా

ఉసిగొలిపే నయనాలు-కౌముది వైనాలు
ఊరించే అధరాలు మధురాతి మధురాలు
అలరేగిన నీ కురులు రేపేనెన్నెన్నో మరులు
చెవులకున్న జూకాలు కలిగించె మైకాలు
అణువణువున నీ అందం  చెలీ అమృతభాడం
నిగ్రహించుకొనడమ్మిక నాకు దినదిన గండం

1.నీ కాటుక సోయగమే కిటుకులెరిగి ఉన్నది
నీ నుదుటన తిలకమే అయస్కాంతమైనది
కనుబొమలే ఎక్కిడిన మదనుడి ధనువైనవి
నిగారింపు నీ చెంపలు కెంపుల కింపైనవి
అణువణువున నీ అందం చెలీ అమృతభాడం
నిగ్రహించుకొనడమ్మిక నాకు దినదిన గండం

2.రతీదేవి నిన్నుచూసి అసూయనే గొన్నది
రంభనే తను నీతో  పందానికి తగనన్నది
రవివర్మ కుంచె సైతం నినుదించ తలవంచింది
జక్కన చెక్కిన శిల్పం నీగొప్పను ఒప్పుకుంది
అణువణువున నీ అందం చెలీ అమృతభాడం
నిగ్రహించుకొనడమ్మిక నాకు దినదిన గండం