తండ్రిగా నిన్ను తలపోసేను
కొడుకువని నీకు ప్రేమపంచేను
అండగావుండవయా వెండికొండ దేవరా
అండపిండబ్రహ్మాండమంతా నీవేనురా
శ్రీశైల మల్లన్నా నీ పావురాన్ని కానీరా
వేములాడ రాజన్నా ననుకోడెగ మననీరా

1.త్రిశూలధారీ అహమును అణిచేయరా
త్రినేత్ర నాలో కర్మలు మసిచేయరా
త్రికాలరూపా జన్మసఫలము సేయరా
త్రిభువనపాలకా నన్నుద్ధరించరా
గురువుగ నిన్ను భావించేను
శిశ్యుడినై నేనూ సేవిస్తాను
కాళహస్తీశ్వరా పరసౌఖ్యమునీయరా
కాళేశ్వరముక్తీశ్వర ముక్తినిదయసేయరా

2.ఆనందభాష్పాలు అభిషేకించనీ
నా నయన కమలాల పూజించనీ
నమకచమక స్తోత్రాల నినుకీర్తించనీ
నమఃశివాయ పంచాక్షరి నను జపియించనీ
మిత్రునిగా నిన్ను స్వీకరిస్తాను
నా హితునిగ సర్వదా అభిమానిస్తాను
శ్రీరామలింగేశ్వర సాయుజ్యము నీయర
కాశీ విశ్వేశ్వరా కైవల్యము నీయరా