వెన్నెలే ఎంతో వేడి అమ్మ చూపు కన్నా
తేనియే కడు చేదు అమ్మ పిలుపు కన్నా
కన్నా అని పిలిచినంత కడుపునిండి పోవులే
నానీ అని తలనిమిరిన మనసుకెంతొ హాయిలే

1.కమ్మనైన రుచి ఏది అమ్మగోరుముద్ద కన్న
మధురమైన గీతమేది అమ్మజోల పాటకన్న
అనురాగం అమృతము కలుపుతు కుడిపిస్తుంది
అరిచేతిలొ పాదముంచి నను నడిపిస్తుంది

2.నీరెండ కన్నా వెచ్చనిది అమ్మ ఒడి
మోదానికి ఖేదానికి నా కోసమే అమ్మ కంటతడి
చాదస్తం  అమ్మదంటూ అశ్రద్ధనే నే చేసినా
సర్వస్వం నేనేనంటు అమ్మకు ఆరాటమే ఎపుడు చూసినా

3.అన్నమయ్య రాసాడు వెంకన్నను కీర్తిస్తూ
అతులితమౌ పదాలు ముప్పది రెండు వేలు
ఏ కవీ రాయలేడు అమ్మప్రేగు బంధాన్ని వివరిస్తూ
అలతి అలతి పదాలలోనైనా బ్రతికినన్నాళ్ళూ