అడుసు తొక్కుడెందుకు-కడుగ మిడుకుడెందుకు
ఆదిలోనె అణిచేయ్యక-సోది నియతులెందుకు
దారి గుంతలెందుకు-వీథి చీకటెందుకు
మన మొకమే బాగులేక అద్దముననుడెందుకు

1.ఫాక్టరీలె మూసేస్తే-ప్లాస్టిక్కు చిక్కదుగా
నిషేధమే విధిస్తే-మద్యపానముండదుగా
అంగట్లో అమ్మనిచ్చి-ఆంక్షల ఆరాటమేల
అతిక్రమించారని-దండుగులే దండుకొనుడ?

2.ఉన్ననాడు వృధాచేసి-లేనినాడు ఏడ్వడమా
దుబారాను చేరదీసి-ఋణగ్రస్తులవ్వడమా
ముందుచూపు లేనివాడు-ఎందులకూ కొఱగాడు
గ్లోబల్ వార్మింగ్ పేర-గోలగోల చెయ్యడు

3.తయారీలొ మితి బిగిస్తె-నియంత్రించ సులువెగా
అతివేగం అవలీలగ-కట్టడి చేయొచ్చు కదా
ఖజానాకు ఋజుమార్గం-జరిమానా ఐతె ఎలా
రాయితీల పేరుతో-సోమరులను చేస్తె ఎలా

4.కొంటె పన్ను ఉంటె పన్ను-నడిపితె అడుగడుగు పన్ను
రోడ్డు పన్ను టోలు పన్ను-సరిలేని సిగ్నళ్ళు దాటితేను పన్ను
వాహనమే గుదిబండగ-పళ్ళనూడగొట్టు పన్ను
పన్నులపై పన్నులేగ-ప్రభుతకెపుడు వెన్నుదన్ను