ఎలా నిను మెప్పించనూ -ఏమని నేనొప్పించనూ
అన్నీ తెలుసుననుకోనా-ఏదీ ఎరుగవని నేర్పనా
మనసు మనసు తో పలికే భాష ఏదో
కనులు కనులతో తెలిపే భావమేదో


1.అమాయకం అనుకోలేను గడసరివి నీవైతే
అయోమయం అనిఅనలేను లౌక్యమెంతొ నీకుంటే
నటనలందు నీవు ఘటికురాలివే
నాట్యమందు నీవు వనమయూరివే
నన్నేమార్చ చూస్తావు నా ఏమరుపాటులో
కొమ్మలుచాటు చేస్తావు నీ కమ్మని పాటల్లో
చాలించవే నీ సయ్యాటలు
ఆపేయవే నీ దొంగాటలు

2.జలతారు మేలి ముసుగులో అందాలు కననీవు
నీ కిలకిల నవ్వులతో ఎద సవ్వడి విననీవు
ఎక్కడో గిల్లుతావు ఎరుగనట్టె ఉంటావు
వలపునెంతొ చల్లుతావు మౌనంగ ఉంటావు
గుండెల్లోన పగలే రేగే దహించగానన్ను
రేయంతా కలలై సాగి స్మరించే నిన్ను
చెప్పబోకు నాకు నమ్మలేను కథనాలు
విప్పిచూపు నాకు మదిలోని మర్మాలు