ఎద కదులు కారణం నువ్వు-నా కవిత తోరణం నువ్వు
ఉండబోకు గుండెకు దవ్వు-దండిగా నవ్వులు రువ్వు
నీ సావాసమే పారిజాత పరిమళము
నీ సాన్నిధ్యమే ఉత్పేరక సుమశరము
కనుమరుగై పోకుమా నా నేస్తమా
నిను వీడి మనలేనూ నా మిత్రమా

1.కౌముదిని కనలేకా  కలువలకు మనుగడ యేది
జాబిలిని కోరలేకా చకోరాల బ్రతుకేదీ
నింగికాస్త మెరవాలంటే మబ్బు మబ్బు తాకాలి
మబ్బుమురిసి కురవాలంటే పవనమల్లుకోవాలి
తెలుసుకో నేస్తమా ప్రకృతి సత్యం
ఎరిగి మెలుగు మిత్రమా మన స్నేహితత్వం

2.కిసలయాల రుచిగనక పికమునకు సుఖమేది
మృణాళికల గ్రోలకనే కలహంసకు గతియేది
నెమలి నాట్యమాడాలంటే మేఘావృతమవ్వాలి
రామచిలుక పలకాలంటే మెత్తగా దువ్వాలి
తెలుసుకో నేస్తమా ప్రకృతి సత్యం
ఎరిగి మెలుగు మిత్రమా మన స్నేహితత్వం