రచన,స్వరకల్పన&గానం:డా.రాఖీ

కడుపులోని చల్లకాస్త కదలనంత సేపు
మనకాలికి ఏ మట్టీ అంటనంత వరకు
చెబుతాము ఎన్నైనా గొప్పలూ గప్పాలు
బోధిస్తూ ఉంటాము  ప్రవచనాలు నీతులు
సహానుభూతిచెందాలి సాటిమనిషిగా
సాయమందించాలి మనవంతు బాధ్యతగా

1.నిలుచున్న తావులో భూకంపం వస్తుంటే
ఏ అర్ధరాతిరో ఉప్పెన విరుచుకపడితే
కమ్మని కలల వేళ విషవాయువు కమ్మేస్తే
ఉపాధికోల్పోయే విఘాతమెదురైతే
ఉన్నఫళంగా ఇల్లూపట్టునొదలాల్సిరావడం ఎంతకష్టం
దారీతెన్నూ తెలియక విలవిలలాడడం ఎంతటి దురదృష్టం
సహానుభూతిచెందాలి సాటిమనిషిగా
సాయమందించాలి మనవంతు బాధ్యతగా

2.అష్టకష్టాలతో బ్రతుకు భ్రష్టుపడుతుంటే
వికృత మహమ్మారి విచ్చలవిడి కబళిస్తే
ప్రాణాపాయమెదురై ఓడలుబళ్ళైపోతే
మందేలేని రోగాలు పట్టిపట్టి పీడిస్తే
కూలినమేడల కడ నీడైనా దొరకని దుస్థితే దుర్భరం
పట్టెడన్నానికై చేయిసాచాల్సి రావడం మరణ సదృశం
సహానుభూతిచెందాలి సాటిమనిషిగా
సాయమందించాలి మనవంతు బాధ్యతగా