రచన,స్వరకల్పన&గానం:డా.రాఖీ

రాగం:కామవర్ధిని(పంతువరాళి)

అర్థంకాదు అందరికీ నాలోని భావన
వ్యక్తమే చేయలేను నీపై ఆరాధన
నా మౌనభాషకే భాష్యం రాసే నేర్పరినీవు
నీ చిలిపి ఊహకే పదములు అల్లే కూర్పరి నేను
కలలు కల్పనలే కమ్మని కవనాలు
కరుగుతున్న ఈ క్షణాలు ఆనందనందనాలు

1.నేను నిజం నా కవిత నిజం
స్ఫూర్తినీవే అన్నమాట ముమ్మాటికీ నిజం
నీవో భ్రమగా ఒక మధురిమగా
మరులను రేపుతున్నదే పచ్చినిజం
కమలం భ్రమరం సంపర్కం
మిథ్యయన్నదే గుప్పిటగప్పిన నిజం
సృజనకు మూలం సుదతియన్నదే
అనాదిగా ఎల్లరు ఎరిగిన పరమనిజం

2.పరిమితి లేదు అనుమితి కృతిగా
నీ అందచందాలు నీమేని గంధాలు
ఎల్లలు లేవు పరిగణ చేయగా
నీతో ఊసులుబాసలు విరహాలు విహారాలు
ఇంతకన్న గొప్పగా ఎంతగానొ చెప్పినా
పోలికకందదు నీ సౌందర్యం
ఎన్నిసార్లు గ్రోలినా అనుభూతెంత పొందినా
చేదనిపించదు నీ మాధుర్యం