రచన,స్వరకల్పన&గానం:డా.రాఖీ

మీనాల నయనాలు వేసేను గాలాలు ఎంతో చిత్రంగా
చూపుల విరితూపులు చేసేను గాయాలు ఎదకే ఆత్రంగా
కనుబొమల కనుమల్లొ భానూదయాలు
సమసేను ప్రేమల్లో అనుమాన తిమిరాలు
ముంగురులే పాడేను  ప్రణయ గీతాలు
దరహాస చంద్రికలే పూసే నవనీతాలు

1.కవనాలు మౌనంగ రాసే ప్రేమలేఖలు
 కపోలాలు సిగ్గుతొ చేసేను నృత్యాలు
కనుపాపలొ నా రూపును బంధించినావు
కలలోను నను కలువగ తపియించినావు
కడకొంగుకే నన్ను ముడివేసుకున్నావు
కడదాకా నడిచేందుకె చేయందుకున్నావు

2.ఎన్నెన్ని తిరిగానో గుళ్ళూగోపురాలు
అనురాగ దేవతకై మది మందిరాలు
నీయంత నీవే ఎదురొచ్చి మెచ్చావు
గురిఎంతో కుదిరి నీ  మనసిచ్చినావు
నినువీడి మనలేను ఏడేడు జన్మాలు
చావైన బ్రతుకైన తోడుంటే అదిచాలు