రచన,స్వరకల్పన&గానం:డా.రాఖీ

తలపుల తోటలో వలపుల పాటవే
తపనల బాటలో తరగని ఊటవే
తన్మయమొందగా అందాల విందువే
తమకము తీరగా పరువాల పొందువే
చేజారిన మణిపూస రాలేవే నా దెస
ఏమారిన వేళలో ఎదురైందీ అడియాస

1.బ్రతుకునకొక్క మారె చావన్నది బూటకం
క్షణక్షణం ఛస్తున్నా నీ ప్రేమే పితలాటకం
నీతో జతగా నీ ప్రతి ఊహా కర్పూరం
వెలిగి కరిగి పోయింది బంగారు జీవితం
చేజారిన మణిపూస రాలేవే నా దెస
ఏమారిన వేళలో ఎదురైందీ అడియాస

2.నిస్సహాయమైననీ చూపేనా గుండెకోత
డోలాయమానమైన నీ మనసే విధివంచిత
ఎదురొచ్చి ప్రతిసారి ఇరువురిలో కలవరం
పొరపాటో గ్రహపాటో ఎరుగమైతిమే వివరం
చేజారిన మణిపూస రాలేవే నా దెస
ఏమారిన వేళలో ఎదురైందీ అడియాస