రచన,స్వరకల్పన&గానం:డా.రాఖీ

వేదాంత మెంతగ చెప్పితేనేం చట్టాలనెన్ని గుప్పితేనేం
తన్నుమాలిన ధర్మమేది ఉండబోదుర సోదరా
పనికిమాలిన సొల్లుకబురులు వాగడం తగదురా

ధర్మ పన్నాల్ వల్లించితేనేం మూల్యమే చెల్లించితేనేం
తన్నుమాలిన ధర్మమేది ఉండబోదుర సోదరా
వంచనల పంచన చేరగ మినహాయింపే లేదురా

నీతులే బోధించితేనేం న్యాయముగ వాదించితేనేం
తన్నుమాలిన ధర్మమేది ఉండబోదుర సోదరా
తమదాక వస్తే నియమాల మాటే చేదురా

బాసలెన్నైనను చేసితేనేం ఆశలే కల్పించితేనేం
తన్నుమాలిన ధర్మమేది ఉండబోదుర సోదరా
పదవి వరకే పలుకు విలువ నిజం చెబితె బాధరా

సాంత్వనలు కల్పింతేనేం ఉచితసలహాలిచ్చితేనేం
తన్నుమాలిన ధర్మమేది ఉండబోదుర సోదరా
నొప్పి తీవ్రత చెప్పతరమా రాఖీ లోకం వినదురా