వన వాటిక సంచరించె ముని కన్యకవో
నెలనాటి జాబిలి వెన్నెల తునుకవో
జలపాతధారల నురగల మెరుపువో
హిమవన్నగ శ్వేతవర్ణ కాంతిరేఖవో
సౌందర్యం సౌశీల్యం కలబోసిన కలికివో

1.అలనాటి దుష్యంతుని శాకుంతలవో
అవీక్షితుని వరించిన వైశాలినివో
ఋష్యశృంగ పత్ని దశరథపుత్రి శాంతవో
శ్రీరాముని పదతాడిత సతీ అహల్యవో
సాంప్రదాయ సోయగం సొంతమైన దానవో

2.కలనైనా పరపురుషుల తలవని సీతవో
పతికోసం దండధరుని ఎదిరించిన సావిత్రివో
త్రిమూర్తులకె పాలిచ్చిన అనసూయా మాతవో
యజ్ఞోద్భవి పంచ పాండవ సతి ద్రౌపది నీవో
విలువలకే కట్టుబడిన అల దమయంతి వీవో