రచన,స్వరకల్పన&గానం:డా.రాఖీ

నవ్వనిదేముంది నీ మోములో

నచ్చనిదేముంది నీ వదనసీమలో

ప్రతిరేయీ పున్నమే నీ సన్నిధిలో

అనుక్షణమూ స్వర్గమే నీ కౌగిలిలో

1.ఒద్దికగా నయగారమొలుకు నీ కురులు

పాపిట మెరిసేటి పావన సింధూరము

నుదుటన వెలిగేటి కుంకుమ తిలకము

మదనుని విల్లంటి ఎక్కిడిన కనుబొమలు

2.కోటేరులాటి మిసమిస వన్నెల నాసిక 

చామంతి కాంతినొలుకు చక్కని ముక్కుపుడక

కనులలో మనసుకు పంపే ప్రేమలేఖలు

కనుచూపులో రారమ్మని ఎదకు ఆహ్వానాలు

3.చెక్కిళ్ళలో విచ్చుకున్న సుమసౌరభాలు

పెదవులతో రగిలించే ప్రణయ సందేశాలు

చుబుకమునే ముద్దుచేయ అనుమతి పత్రాలు

నగవుల సెగల జల్లులో తడవగ ఆత్రాలు