రచన,స్వరకల్పన&గానం:డా.రాఖీ

ఈ ఒంటి కంటి కొంటె చూపులేంటో

నీ పంటినొక్కు వెంటాడగ వలపు పిలుపులేంటో

జడుడైనా మడివీడి నీ జంటగా మారడా

మునియైనా తపముని మాని తుంటరైపోడా

కేశిని కలశస్తని తాటంకిని నితంబిని 

నెరజాణా తరళేక్షణా సరస శృంగార వీణా 

1.వాలు చూపులు ఓర చూపులు దాటేసినావే

వేలి చుట్టులు కాలి గీతలు మించిపోయావే

నర్మగర్భ ఆహ్వానాలు మాయమాయెనే

సంకేత పదబంధాలు పాతవింతలాయెనే

విప్పేయకే చప్పున ఇప్పుడే విస్మయగుప్పిటి 

ఊరించగ ఉడికించగ రాజేయవే తపనల కుంపటి

2.ఏటివంక నువ్వు రావడం నీటివంకతో

గోడ మాటు మాట కలపడం గోరువంకతో

కోవెల గంటల గణగణలో రహస్య భాషలో

కోనేటి కలువలడగడం కలువగ మిషతో

అపురూపమౌ అరుదైన ఆ విలక్షణ లక్షణాలు

అనుభూతులై ఆహ్లదమొలుకగ నిరీక్షణ క్షణాలు