రచన,స్వరకల్పన&గానం:డా.రాఖీ
మళ్ళీ పుట్టాలి మనం
మనదైన లోకంలో ఈ క్షణం
ఆంక్షలేవి లేని చోట ఆకాంక్షలు తీరే వాకిట
వాస్తవికతకు సమాంతరంగా
భావుకతకు సుందర తీరంగా
1.ఆకలి దప్పులకు తావుండదచట
జరా మరణాలకు వీలుండదచట
అనురాగమొక్కటే విరిసేటి తోట
ఆనందం మాత్రమే కురిసేటి చోట
అది అందమైన మనదైన ఊహల జగము
అట నీవు నేను ఒకరికొకరం చెరి సరి సగము
2.పలుకుల జలపాతాలే ప్రవహిస్తుంటే
పాటల పారిజాతాలే పరిమళిస్తుంటే
అమృతాన్ని ఆసాంతం ఆస్వాదిస్తూ
హాయినే జీవితాంతం అనుభూతిస్తూ
కలిసి మనం పయనిద్దాం దిగంతాల దాకా
కలలపంట పండిద్దాం యుగాంతాలదాకా
No comments:
Post a Comment