నాదానివై మంజుల నాదానివై

ఆవిర్భవించావు నిశ్శబ్ద విశ్వమే రవళించగా

మోదానివై ఎదల ప్రమోదానివై

అవతరించావు చిరకాల స్వప్నమే ఫలించగా

అందుకో నేస్తమా జన్మదిన శుభాకాంక్షలు

ఆనందమే చిందగా కురిపింతు అక్షరాక్షంతలు

1.మూర్తీభవించిన స్త్రీమూర్తిగా సౌహార్ద దీప్తిగా

తీర్చిదిద్దిన అపరంజి బొమ్మగా ముద్దుగమ్మగా

పదహారు కళలొలికే సిరిగా సౌందర్య లహరిగా

 విలసిల్లు వికసించే విరిగా జనాళికే స్ఫూర్తిగా

అందుకో నేస్తమా జన్మదిన శుభాకాంక్షలు

ఆనందమే చిందగా కురిపింతు అక్షరాక్షంతలు

2.ఉపాధ్యాయ ఉద్యోగాన  పదోన్నతే పదింతలై

కవనలోక తలమానికగా పురస్కార పులకింతలై

షట్కర్మయుక్తగా కాపురాన ప్రేమలే చిగురించగా

జీవితమే సాఫల్యమొందగ కనులే చెమరించగా

అందుకో నేస్తమా జన్మదిన శుభాకాంక్షలు

ఆనందమే చిందగా కురిపింతు అక్షరాక్షంతలు