రచన,స్వరకల్పన&గానం:డా.రాఖీ

వెన్నెలనే చీరగా కట్టుకున్నావే

కన్నులలో చుక్కలనే నిలుపుకున్నావే

పెదాలపై చంద్రవంక నుంచుకొన్నావే

చెంపలపై సొంపులెన్నొ వంపుకొన్నావే

కలల్లోన కవ్వించే గంధర్వకన్యవే

కళ్యాణివై  మురిపించే రాగరమ్యవే

1.నీ స్నేహమె నాకు అపురూప బహుమానమె

నీ చెలిమే నాపాలిటి జన్మాల తపఃఫలమె

నీ మైత్రి ననుమెచ్చి దైవమొసగినట్టి వరమె

నీతో అనుబంధమే అనన్యమౌ రాధామాధవమే 

సౌందర్యవతివై పాలించే చంద్రకళవే

మధ్యమావతివై లాలించే మంజుల రవళివే

2.ఎడారిలో ఏకాకికి ఒయాసిస్సువైనావే

నా చీకటి జీవనాన ఉషస్సువై వచ్చావే

కడదాకా చేయిపట్టి నడిపించే దేవతవే

కడతేరగ నను వీడక తోడొచ్చే నా జతవే

పావనగంగవై భంజించవే మదమునే

శివరంజనీ రంజింపవే నా మనమునే