కానుకగా నీకీయనా నగిషీలు కలబోసిన పసిడి గాజులను

బహుమతినందీయనా మెరిసే రవ్వలు పొదిగిన హారాలని

అలంకరించనా మంజులమగు నీ పదాల స్వర్ణ మంజీరాలని

మణిమయ మకుటమే తలనుంచనా విశ్వైక సుందరి నీవేనని

1.జాంబవంతునితో పోరి కొనితేనా భామామణీ శమంతకమణిని

బొందితోనే అమరావతి చేరి ఎత్తుకరానా పారిజాత తరువుని

ఇంద్ర ధనుసునే దించి చీరగ అందించి

నందింప జేయనా డెందముని

అలకాపురినే నీపరం చేసి మురిపింపగజేయనా నీ మురిపెముని

2.కోహినూరు వజ్రమే నీవైతే మరొకటెలా సంపాదించను

తాజ్ మహల్ సౌందర్యం సరిరాదే

అద్భుత హర్మ్యమేది నిర్మించను

మానవ సాధ్యమేదైనా తులతూగదు

కానుకనీయగా నీ జన్మదినమును

నభూతోనభవిష్యతి నామతి నీకెపుడో ఇచ్చేసితిగా నా మనమును