https://youtu.be/P9Cl39biRiE

నశ్వరమే దేహము నరవరా 

త్రిగుణాన్వితమిది ఎరుగరా 

సత్వ రజస్తమో గుణతత్వములను పరిహరించరా

ముక్తినొందగల విధమిదె విని పరిగ్రహించరా

1.ఉత్తమము ఉన్నతము ఉర్విలో సత్వగుణము

శాంతి సదాచార సద్గుణములు దీని లక్షణము

తపో దాన త్యాగాదులచే సులభమే ఆచరణము

సాత్వికత నోచని జీవుల జన్మలు చర్విత చరణము

2.కాంక్ష అసంతృప్తి పరితాపములు రాజసము

 కామ్యకర్మల వలలో చిక్కిన ఆత్మ నిర్భాసము

జనన మరణ వలయంలో జీవులు తృణ ప్రాయము

తాపత్రయాలకు బద్ధులై కోల్పోదురు విశ్వాసము

3.తామస ప్రవృత్తి మనుషులలో అధమాధమము

సోమరిగా మత్తు భ్రాంతి లో కొనసాగు జీవనము

మాయ మోహితమై బ్రతుకంతా అజ్ఞానాంధకారము

 మరుజన్మలలో వారి పుట్టుక ఇక జీవజంతు జాలము

4.త్రిగుణాతీతుడు సృష్టి లొ ఒకడే పరమాత్ముడు

స్థాయీ భేదమున్నా మనుజుడు త్రిగుణాత్మకుడు

ఈశ్వర శరణాగతిచే ద్వంద్వాతీతుడు మానవుడు

సమత్వదృష్టి వృద్ధినొందగా కాగలడు మొక్షార్హుడు