“ కుప్పతోట్టిలో పసిపాప కంఠశోష ”

అమ్మామాయమ్మా ఓ అమ్మలగన్నయమ్మ 

ముగురమ్మలకే నీవు మూలమందురు గదయమ్మ కవులరాతలే నేతి బీరలు- ప్రేమ అనురాగం కుందేటి కొమ్ములు 

1. నీ నెత్తుటిలో నేను నెత్తురు ముద్దగ 

బొడ్డుపేగు ముడివేసి నను పసిగుడ్డుగ 

మోసావుగదమ్మా మురిపెంగ తొమ్మిది నెలలు 

కన్నవెంటనే బరువైనాన నను సాకగ ఇలలో 

 2. ఎంగిలాకులే పొత్తిళ్ళుగా 

లాలాజలమే నీ చనుబాలుగా

భావించి విసిరావా చెత్తకుండీలో 

వదిలించుకున్నావా నను పెంటబొందలో 

3. కుక్కలైనా పీక్కతినలేదు కాసింత జాలితో 

ఒక్కమనిషీ నను గనలేదు పిసరంత ప్రేమతో 

మానవజాతికే నేను మచ్చనైపోతి 

నా కన్నతల్లికే నేను శత్రువైపోతి 

 4. అనాథకున్న బాధెంతో నీవెరిగేవా 

అమ్మా అనుమాటకైన అర్థం తెలిసేనా 

కన్నవెంటనే నను చంపవైతివే 

కరుణ తోడనూ కాస్త పెంచనైతివే