వెళ్ళిపోయిన ఆవసంతం మళ్ళివస్తుందా
తోటకు మరలి వస్తుందా
మూగవోయిన పికమే ఇకపై మరలకూస్తుందా
మదికే హాయినిస్తుందా
చేజారి పగిలిన అద్దం మామూలుగ ఔతుందా
చెదిరిపోయిన మధురస్వప్నం తనువరిస్తుందా

1.మడమతిప్పదెప్పుడూ ముందుకే సాగేకాలం
గుఱే తప్పదెన్నడూ విధి విధిగ సంధించేబాణం
జ్ఞాపకాలు శూలాలై గుండెనే గుచ్చుతుంటే
అనుభూతులు జ్వాలలై మనసునే మండిస్తుంటే
 ఎలానయమౌతుంది సలుపుతున్న గాయం
ఓర్చుకోలేని వ్యధ కంటే నరకమెంతో నయం

2.ఆ దారం తెగిన పతంగం జారేది ఏ తావో
తుఫానులో చిక్కిన నావ చేరేది ఏ రేవో
రెప్పపాటులోనే జీవితమే కుప్పకూలు
తప్పుమనది కాకున్నా జాతకాలె తారుమారు
ఎవరు మార్చి రాయగలరు నుదుటిరాతను
ఎవరు మాన్పివేయగలరు కడుపుకోతను