చెలి నవ్వులే హరివిల్లులు
చెలి చూపులో వెన్నెల జల్లులు
తొలి ప్రేమ గురుతులు ప్రియురాలి తలపులు
యాదికొస్తేనె మదికెంత పులకింతలు

గుడిమెట్లమీద నది గట్టుకాడ
కాపు కాసి చూసేటి ఆ దొంగ చూపులు
అలనాటి స్మృతులు చిననాటి చేష్టలు
గుర్తుకొస్తేనె కన్నుల్లొ చెమరింతలు
తొలి ప్రేమ గురుతులు ప్రియురాలి తలపులు
యాదికొస్తేనె మదికెంత పులకింతలు

తెల్లారిమసకల్లొ ముగ్గేయచూడగ
తెల్లార్లు నావింత కలవరింతలు
నా మూగ ప్రేమ నా మౌన భాష
ఎదవిప్పజాగైన నా చింతలు
తొలి ప్రేమ గురుతులు ప్రియురాలి తలపులు
యాదికొస్తేనె మదికెంత పులకింతలు

బడివదిలినపుడో నడివీథిలోనో
వెనువెంట నడిచే ఆ వెంబడింతలు
అవి స్వప్నలోకాలు చెలి జ్ఞాపకాలు
భగ్న ప్రేమైతెనేమి మధురక్షణాలు
తొలి ప్రేమ గురుతులు ప్రియురాలి తలపులు
యాదికొస్తేనె మదికెంత పులకింతలు