అందానికెన్నెన్నో భిన్నమైన కోణాలు
ఆన్నీ ఎదలోన గుచ్చుకునే బాణాలు
రూపలావణ్యం కొందరిది-మేని సౌష్ఠవం కొందరిది
నిండైన స్త్రీత్వం కొందరిది-మెండైన మనస్తత్వం కొందరిది
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ

1.తొలిచూపులోనె తలతిప్పుకోనివ్వదు సుందర వదనం
అమరిన ప్రతిఅంగం మన్మథరంగంలా మోహం పెంచేను దేహం
ఎదురైనవెంటనే దేవతలాతోచును శుభాంగి కట్టుబొట్టు లక్షణం
ఆదరించినంతనే ఆత్మీయత కురిపించును సుదతి స్నేహితం
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ

1.కృష్ణవర్ణమైతెనేమి ఆకట్టుకుంటుంది అన్నులమిన్న
పొట్టిపొడుగు ఏదైనా అల్లుకపోతుంది అల్లరి కూచి
చెరగని నవ్వుతొ ప్రసన్న దృక్కులతో మనసు చూరగొంటుంది ముదిత
అరమరికలు లేకుండా బింకానికి పోకుండా కలిసిపోతుంది కలికి
ఏదో ఒక ప్రత్యేకతవినా సృష్టించడు చతుర్ముఖ బ్రహ్మ
మననిమనం ఎరిగితేనె సార్థకం మానవ జన్మ