నుదుటి మీది పుట్టుమచ్చ బొట్టు లెక్కనీకు
పెదవి మీది పుట్టుమచ్చ దిష్టి చుక్కనీకు
కమ్ముకున్న కారుమబ్బులల్లె తోచె నీ కురులు
పున్నమి జాబిలియై వెలిగేను నీ మోము సౌరులు
సఖీ  నీవు సౌందర్య దేవతవు
చెలీ నీవు అనురాగ దీపికవు

1.కనులు కనులు కలిపితే-రెప్పగిలుపలేము
చూపు మనసు తెలిపితే-తప్పుకొనగలేము
ప్రవహించెను భావఝరి-హృదయసీమలోకి
ప్రసరించెను రసమాధురి-హాయినంత ఒలికి
సఖీ నీవు ప్రణయ ప్రబంధం
చెలీ నీవు పుష్ప సుగంధం

2.మలయ మారుతం వేసవిలో నీ సహచర్యం
హర్ష వర్షపాతం ఎడారిలో నీ  సహయోగం
లిఖించేను అహరహరం - నీ గీతాగోవిదం
తపించేను ఇహం పరం - నీ జతయే ఆనందం
సఖీ నీవు సత్యం శివం సుందరం
చెలీ నీవు సత్వరజస్తమో మందిరం